AQSh prezidentligiga Respublikachilar partiyasidan nomzod bo‘lishga da’vogar Donald Tramp Kaliforniya shtatidagi saylovchilar o‘rtasidagi so‘rov natijalariga ko‘ra yetakchilik qilmoqda. Bu haqda “TASS” xabar berdi.
Fox News ma’lumotlariga ko‘ra, milliarderni so‘rovda ishtirok etganlarning 38 foizi qo‘llab-quvvatlamoqda. Uning raqiblari bo‘lmish Texas shtatidan senator Ted Kruzda bu ko‘rsatkich 27, Ogayo shtati gubernatori Jon Keysikda esa 14 foizni tashkil etdi. Kaliforniyadagi dastlabki saylovlar 7-iyun kuni bo‘lib o‘tadi, mazkur shtatdan AQSh prezidenti lavozimiga nomzod saylanadigan Respublikachilar partiyasi syezdiga 172 nafar delegat ilgari suriladi.
Kaliforniya boshqa shtatlarga solishtirganda syezdga eng ko‘p sonli delegatlarni yuborgani sababli Tramp iyulda bo‘lib o‘tadigan syezdga qadar Respublikachilar partiyasidan rasmiy nomzod bo‘lish uchun talab etiladigan 1237 nafar delegat ovozini to‘play olish-olmasligi bu yerdagi praymeriz yakunlariga bog‘liq. Hozircha u 739 nafar delegat ovoziga ega (Ted Kruzda 465, Jon Keysikda esa 143 ovoz) .
Tramp so‘rov natijalariga Facebook orqali darrov munosabat bildirdi va o‘z sahifasida “Ajoyib yangiliklar uchun rahmat, Kaliforniya! Tez orada sizlarda bo‘laman”, deya izoh qoldirdi.
Izoh (0)