Rossiya Tergov qo‘mitasi Xodorkovskiyni davlatdan 50 mlrd dollarni o‘marishga harakatda aybladi

“YuKOS” neft kompaniyasining sobiq rahbari Mixail Xodorkovskiy xalqaro sudlar yordamida davlatdan 50 milliard dollar undirishga harakat qilmoqda. Bu haqda Rossiya Tergov qo‘mitasi rasmiy vakili Vladimir Markin ma’lum qildi, deya xabar beradi Meduza.

Uning aytishicha, tergovda Xodorkovskiy “YuKOS” aksiyalarini deyarli suvtekin olgani va aslini olganda, o‘g‘irlaganini oshkor qiluvchi yetarlicha asoslar bor. Shu bois “YuKOS” va “Xalley Enterprayzis Limited”, “Yukos Yuniversal Limited” hamda “Veteran Petroleum Limited” kompaniyalari sobiq aksiyadorlari ularning investor sifatidagi huquqlari buzilganini da’vo qilib, Gaagadagi arbitrajga tovon so‘rab murojaat etishga haqli emas, chunki ular hech qanday  investitsiya qilmagan.

“YuKOS” aksiyalarini sotib olish MENATEP banki mablag‘lari hisobiga amalga oshirilgan, biroq unga pullari qaytarilmagan, bankning o‘zi esa bankrot qilingan. Markinning fikriga ko‘ra, bu Xodorkovskiy neft kompaniyasi aksiyalarini birovlarning puliga, bekorga xarid qilgani, ya’ni o‘g‘irlanganidan dalolat.

Shuningdek, Xodorkovskiy kompaniya rivoji uchun 350 million dollar ajratishni va’da qilgan, biroq buning uddasidan chiqmagan.