Do‘sti bilan ko‘ngilxushiga jo‘nagan britaniyalik Ispaniyada uyg‘ondi

Do‘sti bilan ko‘ngilxushi uchun Chelmsford shahriga yo‘l olgan britaniyalik Aleks Keviyel Ispaniyada uyg‘ondi. Bu haqda “Gazeta.ru” xabar bermoqda.

Keviyelning aytishicha, u piyanista emas, biroq o‘sha gal u kechasi bilan ichkilikka berilgan. Qaysidir dam og‘aynisini ko‘zdan yo‘qotadi va tamaddi qilib olish uchun tashqariga chiqadi. Yaqin orada esa Londonning Stansted aeroportiga avtobus yo‘l oladigan bekat joylashgandi.

“O‘zimga-o‘zim ‘qayergadir uchib ketsam ajoyib ish bo‘lardi’, deganimni eslayman”, — deydi Keviyel. Shundan so‘ng britaniyalik u go‘yoki samolyot bortida ekanligi haqida “tush” ko‘radi. Ma’lum bo‘lishicha, Keviyel chindan ham Barselonaga yo‘l olgan ekan. U nima sodir bo‘lganini tushunib yetganida otasiga qo‘ng‘iroq qildi, u esa bo‘lib o‘tgan voqeani “o‘ta kulgili” deya baholadi.

Oldinroq shirakayf shotlandiyalik tasodifan Rioga chipta olgan va “bir umrga tatigulik safar”da bo‘lib qaytgandi.