АҚШ президентлигига Республикачилар партиясидан номзод бўлишга даъвогар Дональд Трамп Калифорния штатидаги сайловчилар ўртасидаги сўров натижаларига кўра етакчилик қилмоқда. Бу ҳақда «ТАСС» хабар берди.
Fox News маълумотларига кўра, миллиардерни сўровда иштирок этганларнинг 38 фоизи қўллаб-қувватламоқда. Унинг рақиблари бўлмиш Техас штатидан сенатор Тед Крузда бу кўрсаткич 27, Огайо штати губернатори Жон Кейсикда эса 14 фоизни ташкил этди. Калифорниядаги дастлабки сайловлар 7 июнь куни бўлиб ўтади, мазкур штатдан АҚШ президенти лавозимига номзод сайланадиган Республикачилар партияси съездига 172 нафар делегат илгари сурилади.
Калифорния бошқа штатларга солиштирганда съездга энг кўп сонли делегатларни юборгани сабабли Трамп июлда бўлиб ўтадиган съездга қадар Республикачилар партиясидан расмий номзод бўлиш учун талаб этиладиган 1237 нафар делегат овозини тўплай олиш-олмаслиги бу ердаги праймериз якунларига боғлиқ. Ҳозирча у 739 нафар делегат овозига эга (Тед Крузда 465, Жон Кейсикда эса 143 овоз) .
Трамп сўров натижаларига Facebook орқали дарров муносабат билдирди ва ўз саҳифасида «Ажойиб янгиликлар учун раҳмат, Калифорния! Тез орада сизларда бўламан», дея изоҳ қолдирди.
Изоҳ (0)