Bryussel aeroportida o‘zini portlatib yuborgan xudkush terrorchilardan biri Najim Laakraviy bo‘lgan, u o‘tgan yilning noyabrida Parijdagi Bataclan klubiga terrorchilik hujumini uyushtirishda ham gumon qilingan edi. Uning shaxsini Belgiya federal prokuraturasi tasdiqladi, deb yozadi “RBK”.
Laakraviy o‘zini Bryussel aeroportida Ibrohim al-Bakraviy bilan birga portlatgan. Uchinchi terrorchi hamon qidiruvda.
CBS News Belgiya politsiyasidagi manbasiga tayanib xabar berishicha, Laakraviyning DNK namunasi Bryussel aeroportidagi portlash yuz bergan joyda aniqlangan.
Belgiya prokuraturasi ma’lumotlariga ko‘ra, Laakraviyning DNKsi, shuningdek, Parijda 13-noyabr kungi hujumlarda qo‘llanilgan bir nechta portlovchi qurilmalarda va Parijdagi Bataclan klubida ishlatilgan mato parchasida ham topilgan.
Eslatib o‘tamiz, oldinroq Bryussel aeroportidagi bombani aka-uka Bakraviylar portlatgani xabar qilingandi.
Politsiya ma’lumotlariga ko‘ra, aeroportdagi portlashga jami uch kishi aloqador bo‘lgan, ulardan ikki nafari halok bo‘lgan, uchinchisi aerovokzal binosidan qochib qolgan.
22-mart, seshanba kuni Belgiya poytaxtining aeroporti va metrosida qator portlashlar sodir etildi. Natijada, so‘nggi ma’lumotlarga ko‘ra, 36 kishi halok bo‘ldi, 260 kishi jarohat oldi.
Izoh (0)