Futbol bo‘yicha Osiyo Chempionlar Ligasi guruh bosqichi 3-turidan o‘rin olgan so‘nggi o‘yinlar 16-mart, chorshanba kuni bo‘lib o‘tdi. Shu kuni Toshkentning “Bunyodkor” klubi o‘z maydonida “Zob Ohan” bilan golsiz durang o‘ynagan bo‘lsa, Qarshining “Nasaf” jamoasi Qatarda Sardor Rashidov urgan gol sabab “Al-Jaish”ga imkoniyatni boy berdi.
“Bunyodkor” joy olgan “B” guruhining ikkinchi uchrashuvida ham durang qayd etildi — Saudiya Arabistonining “Al-Nassr” klubi o‘z maydonidagi ikkinchi uchrashuvda ham durang o‘ynadi. Qatarning “Lahviya”siga qarshi o‘yinda hisob 7-daqiqada mehmonlar a’zosi Dioko Kaluyituka tomonidan ochilgan bo‘lsa, asosiy vaqt yakuniga 2 daqiqa qolganida Ibrohim G‘olib saudiyaliklarni mag‘lubiyatdan qutqarib qoldi.
“Bunyodkor”ni Toshkentda mag‘lub etgan “Al-Nassr” 3-turdan keyin 5 ochko bilan guruhda yetakchilik qilayotgan bo‘lsa, o‘z darvozasidan birorta ham gol o‘tkazmagan “Zob Ohan” hisobida ham 5 ochko bor. “Bunyodkor” va “Lahviya” esa bir xil — 2 ochkodan to‘plagan.
“Nasaf”ning guruhagi raqiblari — “Al-Ayn” hamda “Al-Ahli” BAAda to‘qnash keldi va mezbonlar Umar Abdulrahmonning 71-daqiqadagi goli evaziga kichik hisobda g‘alaba qozondi. Shunday qilib, 3-turdan so‘ng Sardor Rashidov to‘p surayotgan “Al-Jaish” 9 ochko bilan guruhda yetakchi bo‘lib turibdi, qolgan uch klub hisobida esa uch ochkodan bor.
Eslatib o‘tamiz, “Bunyodkor” ham, “Nasaf” ham OChL guruh bosqichi doirasidagi navbatdagi uchrashuvlarni 5-aprel kuni o‘tkazadi. Shu kuni “Bunyodkor” Eronda “Zob Ohan” mehmoni bo‘lsa, “Nasaf” Qatarning “Al-Jaish” klubini Qarshida qabul qiladi.
Izoh (0)