Futbol bo‘yicha Osiyo Chempionlar Ligasi guruh bosqichi 3-turida Qarshining “Nasaf” jamoasi Qatarning “Al-Jaish” klubiga mag‘lub bo‘ldi. 16-mart, chorshanba kuni bo‘lib o‘tgan o‘yin taqdirini “Al-Jaish”ning o‘zbekistonlik futbolchisi — Sardor Rashidov tomonidan 87-daqiqada urilgan gol hal qildi.
Bungacha bosh murabbiy Ro‘ziqul Berdiyev qo‘l ostidagi “Nasaf” Saudiya Arabistonining “Al-Ahli” klubiga safarda 1:2 hisobida imkoniyatni boy berib, so‘ng ushbu jamoani Qarshida xuddi shu hisob bilan mag‘lub etgandi.
Shu tariqa, 3-turdan so‘ng OChLning “D” guruhida qiziqarli holat yuzaga keldi — Sardor Rashidov jamoasi uch o‘yinda 100 foizlik natija qayd etib, 9 ochko to‘plagan, guruhdagi qolgan uch klub barcha ko‘rsatkichlar bo‘yicha bir xil natija qayd etgan. OFK rasmiy sayti bu borada “Nasaf”ni 3-o‘ringa joylashtirgan.
Qayd etish joiz, “Al-Jaish” guruh bosqichi 3-turidan so‘ng OChLda yuz foizlik natija qayd etayotgan ikki jamoadan biri bo‘lib turibdi. “F” guruhidagi Janubiy Koreyaning “Seul” klubi hisobida ham uch o‘yindan so‘ng 9 ochko bor.
Ma’lumot uchun, Qarshi klubi navbatdagi tur uchrashuvini 5-aprel kuni “Al-Jaish”ga qarshi o‘z maydonida o‘tkazadi.
Osiyo Chempionlar Ligasi “D” guruhi, 3-tur uchrashuvi 16-mart, chorshanba
“Al-Jaish” (Qatar) — “Nasaf” (O‘zbekiston) 1:0 (0:0)
Gol: Sardor Rashidov, 87 (1:0).Ogohlantirish: Maqsud Karimov, 30 (N).“Al-Jaish”: 16. Xalifa Ababakar, 2. Murod Naji Husayn, 4. Lukas Mendes, 6. Yosir Isa, 9. Abdulrazzoq Hamdallah, 10. Sardor Rashidov, 17. Otman al-Yahriy (12. Majid Muhammad, 58), 19. Abdurahmon Muhammad, 23. Xolid Al Zrigiy, 27. Ahmad Muin Duzandeh, 31. Romarino Rikardo (20. Vagner Ribeyro, 90+2).
“Nasaf”: 25. Eldor Suyunov, 4. Maqsud Karimov (27. Islom Rashidxonov, 90+1), 7. Shuhrat Muhammadiyev, 9. Ilhom Shomurodov, 10. Dilshod Rahmatullayev, 17. Artur Gevorkyan, 18. Bahrom Abdurahimov, 20. Erkin Boydullayev, 23. Sherzod A’zamov, 31. Saydullo Rahmatov, 45. Bobir Abdixoliqov (38. Doniyor Narzullayev, 75).