Футбол бўйича Осиё Чемпионлар Лигаси гуруҳ босқичи 3-туридан ўрин олган сўнгги ўйинлар 16 март, чоршанба куни бўлиб ўтди. Шу куни Тошкентнинг «Бунёдкор» клуби ўз майдонида «Зоб Оҳан» билан голсиз дуранг ўйнаган бўлса, Қаршининг «Насаф» жамоаси Қатарда Сардор Рашидов урган гол сабаб «Ал-Жаиш»га имкониятни бой берди.
«Бунёдкор» жой олган «Б» гуруҳининг иккинчи учрашувида ҳам дуранг қайд этилди — Саудия Арабистонининг «Ал-Насср» клуби ўз майдонидаги иккинчи учрашувда ҳам дуранг ўйнади. Қатарнинг «Лаҳвия»сига қарши ўйинда ҳисоб 7-дақиқада меҳмонлар аъзоси Диоко Калуйитука томонидан очилган бўлса, асосий вақт якунига 2 дақиқа қолганида Иброҳим Ғолиб саудияликларни мағлубиятдан қутқариб қолди.
«Бунёдкор»ни Тошкентда мағлуб этган «Ал-Насср» 3-турдан кейин 5 очко билан гуруҳда етакчилик қилаётган бўлса, ўз дарвозасидан бирорта ҳам гол ўтказмаган «Зоб Оҳан» ҳисобида ҳам 5 очко бор. «Бунёдкор» ва «Лаҳвия» эса бир хил — 2 очкодан тўплаган.
«Насаф»нинг гуруҳаги рақиблари — «Ал-Айн» ҳамда «Ал-Аҳли» БААда тўқнаш келди ва мезбонлар Умар Абдулраҳмоннинг 71-дақиқадаги голи эвазига кичик ҳисобда ғалаба қозонди. Шундай қилиб, 3-турдан сўнг Сардор Рашидов тўп сураётган «Ал-Жаиш» 9 очко билан гуруҳда етакчи бўлиб турибди, қолган уч клуб ҳисобида эса уч очкодан бор.
Эслатиб ўтамиз, «Бунёдкор» ҳам, «Насаф» ҳам ОЧЛ гуруҳ босқичи доирасидаги навбатдаги учрашувларни 5 апрель куни ўтказади. Шу куни «Бунёдкор» Эронда «Зоб Оҳан» меҳмони бўлса, «Насаф» Қатарнинг «Ал-Жаиш» клубини Қаршида қабул қилади.
Изоҳ (0)