Ispaniyaning “Barselona” klubi Yevropa Chempionlar Ligasi o‘rniga Yevropa superligasini tashkil etish g‘oyasini qo‘llab-quvvatlaydi. Bu haqda klubning moliyaviy masalalar bo‘yicha vitse-prezidenti Syuzan Monye La Vanguardia nashriga bergan intervyusida aytib o‘tdi, deya xabar bermoqda “TASS”.
“Biz klublarning o‘zi boshqaradigan Yevropa ligasiga asos solishimiz kerak. Hozir biz FIFA va UEFA kabi tashkilotlarga haddan tashqari bog‘lanib qolganmiz. Superliga kabi musobaqani tashkil etish bizning bosh maqsadimiz bo‘lishi kerak”, — dedi Monye.
Avvalroq OAVda Angliyaning “Arsenal”, “Liverpul”, “Manchester Yunayted”, “Manchester Siti”, “Chelsi” kabi grand klublari rahbarlari amerikalik milliarder Stiven Ross bilan uchrashib, Chempionlar Ligasi yoki Angliya Premyer-ligasi o‘rnini bosishi mumkin bo‘lgan yangi musobaqaga asos solish masalasini muhokama qilganliklari haqida xabar berilgandi.
Keyinroq “Arsenal” va “Manchester Yunayted” rahbarlari bunday ko‘rinishdagi superliga tashkil etilishiga qarshi ekanliklarini bildirishdi.
Yangi musobaqaga asos solish g‘oyasi ilk bor 1998-yilda paydo bo‘lgandi. O‘shanda Italiya sport kompaniyalaridan biri — Media Partners Yevropaning yetakchi jamoalari bilan muzokaralar o‘tkazgan, ular orasida “Milan”, “Manchester Yunayted” kabi mashhur jamoalar ham bor edi. FIFA bu taklifga darhol o‘z e’tirozini bildirib, musobaqaga qo‘shilgan milliy uyushmalar, klublar va futbolchilarni diskvalifikatsiya qilish bilan tahdid qilgandi.
UEFA esa bu hodisaga Chempionlar Ligasi guruh bosqichi ishtirokchilari sonini 24 tadan 32 tagacha ko‘paytirish, shuningdek, qit’ada ikkinchi raqamli klublar musobaqasi — Yevropa Ligasi (sobiq UEFA Kubogi)ga asos solish bilan munosabat bildirgan.
Izoh (0)