Buyuk Britaniya politsiyasi Londonning Xitrou aeroportida bo‘m-bo‘sh yo‘lovchi Boeing 747 samolyoti kabinasiga kirib, ichkaridan berkitib olgan kimsani qo‘lga oldi. Bu haqda “TASS” xabar bermoqda.
The Times ma’lumotiga ko‘ra, huquqbuzar British Airways aviakompaniyasi samolyotiga chiqayotganida payqab qolingan. Hodisa joyiga kelgan aeroport xavfsizlik xizmati xodimlari uni havo kemasi bortidan chiqarib yuborolmadi, chunki u uchuvchilar kabinasi eshigini yopib olgandi. Eshiklar o‘q o‘tmas bo‘lgani, hatto portlashni ham ko‘tara olishini inobatga olib, o‘t o‘chiruvchilarni yordamga chaqirish va ular ko‘magida eshikni ochishga to‘g‘ri keldi.
Nashrning bildirishicha, huquqbuzar 38 yoshli portugaliyalik Luis Pedru Verdaska dush Santush Koshta bo‘lib chiqdi. Hozirda qo‘lga olingan va havo kemasi bortiga noqonuniy kirishda ayblanayotgan erkak London qamoqxonalaridan birida sud bo‘lishini kutmoqda. Uni bunday harakatga nima undagani hozircha noma’lum, biroq terakt versiyasi ko‘rib chiqilmayotgani aytilmoqda.
Izoh (0)