Saudiya Arabistoni harbiy havo kuchlarining dastlabki samolyotlari Injirlik aviabazasiga kelib qo‘ndi. Bu haqda, Turkiya prezidenti matbuot kotibiga asoslanib, Reuters agentligi xabar bermoqda.
Turkiya prezidenti Rajab Toyyib Erdo‘g‘onning matbuot kotibi va yordamchisi Ibrohim Kalinning Anqaradagi matbuot anjumanida ma’lum qilishicha, Turkiya 3,8 mingga yaqin kishini IShIDga qarshi kurash uchun yo‘naltirgan. Ayni vaqtda, uning qo‘shimcha qilishicha, Anqara Suriya hududidagi quruqlikdagi operatsiyalarni yakka o‘zi tashkil etish niyatida emas va xalqaro koalitsiya bilan kelishgan holda harakat qiladi.
Kalin Suriyadagi o‘t ochishni to‘xtatish haqidagi sulhning amalga oshirilishini shubha ostiga oldi va Turkiya o‘z milliy xavfsizligiga tahdid soladigan har qanday hodisaga munosabat bildirishini ma’lum qildi.
Injirlikda Saudiya Arabistoni harbiy aviatsiyasi bilan birgalikda 15—20-fevral kunlari mashg‘ulotlar o‘tkazilishini e’lon qilarkan, rasmiy Anqara zarur strategiya bo‘lsa, Ar-Riyod bilan birgalikda IShIDga qarshi quruqlikdagi operatsiyani boshlashi mumkinligini ma’lum qilgandi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)