Rossiya Londondagi Oliy sudga Ukrainadan uch milliard dollar miqdoridagi qarzni undirib berish masalasi bo‘yicha murojaat qildi. Bu haqda RF moliya vaziri Anton Siluanov ma’lum qildi, deb xabar beradi Meduza.
“Biz Ukrainaning Rossiya oldidagi qarzlarini uzish masalasini sudsiz, ikki tomonlama hal etishga tayyorligimizni ko‘p marta bildirdik. Afsuski, Ukraina nafaqat biz, balki Xalqaro valyuta jamg‘armasi ham chaqirgan ‘yaxshi niyat’ ruhidagi muzokaralarni olib borishga tayyor emas ekan. Shuning uchun masalaning yagona yechimi — sudga murojaat etish edi va shunday qilindi ham”, — dedi Siluanov.
2013-yilda Ukraina prezidenti lavozimini Viktor Yanukovich egallab turgan vaqtda Rossiya 15 milliard dollar miqdorida kredit berishga rozi bo‘lgan. Uch milliard dollar miqdoridagi pulning birinchi qismi o‘tkazib berilgan. Ammo Kiyevda hukumat o‘zgargandan keyin Rossiya keyingi to‘lovlarni amalga oshirishdan bosh tortgan.
2015-yilning dekabrida Xalqaro valyuta jamg‘armasi Ukrainaning Rossiya oldidagi qarzlarini suveren deb tan oldi. Ammo Ukraina Rossiyaga uch milliard dollarni qaytarish imkoni yo‘qligini ma’lum qildi.
Izoh (0)