Rossiyada rubl qadrsizlanishi tufayli maishiy texnika va elektronika mahsulotlarini kreditga olishga talab kuchaydi

Rossiya banklari savdo tarmoqlarida beriladigan kreditlarga talab oshganini qayd etmoqda. Bu haqda Meduza xabar berdi.

Kreditlashning yanvardagi darajasi odatda yil davomidagi eng past ko‘rsatkichlar bo‘ladi, biroq POS-kreditlash (savdo tarmoqlarida mahsulotlar sotib olish uchun kredit berish) bozorida yetakchilik qiladigan aksariyat banklarning vakillari talab yuqori bo‘layotganini ma’lum qilgan. Jumladan, “XKF” va “Renessans” banklari tomonidan savdo tarmoqlari orqali 2016-yil yanvarida o‘tgan yil noyabrida berilgan summaga teng miqdorda kredit ajratilgan, “Alfa-bank”da esa yanvar oyi ko‘rsatkichlari noyabrga qaraganda oshishi kutilmoqda.

Bozor qatnashchilari fikriga ko‘ra, iste’molchilar maishiy texnika va elektronikani rubl qadrsizlanishi tufayli qimmatlashishidan avval xarid qilishga intilmoqda. 2014-yil oxirida ham Rossiya valyutasi kursi pasayganda shunday vaziyat kuzatilgan, biroq u paytda aholi xaridlarni kredit emas, asosan o‘z mablag‘i hisobiga amalga oshirgandi.