Turkiyada Erdo‘g‘onni “diktator” deb atagan muxolifat partiya raisiga nisbatan jinoiy ish ochildi

Turkiya bosh prokuraturasi muxolifatdagi Xalq-respublikachilar partiyasi raisi Kamol Qilichdoro‘g‘liga nisbatan prezident Rajab Toyyib Erdo‘g‘onni haqorat qilgani sababli jinoiy ish ochdi. Bu haqda “Korrespondent. net” xabar bermoqda.

Erdo‘g‘onning advokatlari prokuraturaga o‘z himoyalari ostidagi shaxsning sha’niga haqorat bo‘lgani haqida da’vo kiritgan va partiya yetakchisidan 30 ming yevro tovon undirishni talab qilgan. Ularning prokuraturaga murojaat etishiga Qilichdoro‘g‘lining partiya kongressidagi nutqi sabab bo‘lgan. Siyosatchi mamlakat janubi-sharqida o‘tkazilayotgan kurdlarga qarshi harbiy amaliyotni to‘xtatishni talab qilgan 27 nafar turk olimi “diktator deb ham atashadigan kishining ko‘rsatmasi” bilan qamalganini qoralagandi.

Eslatib o‘tamiz, oldinroq Turkiyaning Tekirdog‘ viloyatida yashovchi 17 yoshli o‘smir Erdo‘g‘onni Facebook orqali haqorat qilgani uchun hibsga olingani haqida xabar berilgandi.