Dunyo bo‘yicha 11 mingdan ziyod savdo nuqtalariga ega bo‘lgan AQShning Walmart kompaniyasi yaqin orada 269 ta do‘koni yopilishini e’lon qildi. Bu haqda “TASS” xabar bermoqda.
Walmart vakillarining ma’lum qilishicha, aksariyati AQSh va Braziliyada joylashgan savdo nuqtalarining yopilishi 16 ming atrofidagi ish o‘rniga ta’sir etadi. Kompaniya moliyaviy vaziyatni sinchkovlik bilan o‘rganganidan so‘ng, shuningdek, qator do‘konlarining rentabellik darajasi pastligi tufayli shunday qarorga kelgan.
Shtab-kvartirasi Arkanzas shtatining Bentonvill shahrida joylashgan Walmart dunyodagi eng boy sulolalardan hisoblanadigan Uoltonlar oilasiga tegishli bo‘lib, uning 2014-yildagi mablag‘ aylanmasi 485 milliard dollarni tashkil etgan.
Izoh (0)