AQSh poytaxtidagi milliy hayvonot bog‘i tashrifchilari 16-yanvar, shanba kuni bahaybat panda bolasi Bey Beyni birinchi marta ko‘rishga muvaffaq bo‘ldi. O‘tgan yilning avgust oyida dunyoga kelgan pandani ko‘rish uchun ertalabdan yuzlab bolalar va kattalar yig‘ildi, deb xabar qiladi “TASS”.
Mutaxassislarning so‘zlariga ko‘ra, 5 oylik panda bolasi o‘zini juda yaxshi his qilmoqda va hozirda uning og‘irligi 12 kilogrammni tashkil etmoqda. Unga ismni o‘tgan yilning sentabrida AQSh va Xitoyning birinchi xonimlari — Mishel Obama va Pen Liyuan qo‘ygan. Bey Bey xitoychadan tarjima qilinganda “xazina”, “qimmatbaho” ma’nolarini beradi.
Hayvonot bog‘ining rasmiy vakili Devin Myorfi ikki yil oldin Bey Beyning opasi Bao Bao birinchi marta odamlar oldiga chiqqanda, uni ko‘rgani bir kunda 5,5 ming kishi kelganini aytib o‘tdi.
Qo‘shma Shtatlar Bey Beyning ota-onasi Tyan Tyan va Mey Syanni 2000-yilda Xitoydan ijaraga olgan. Joriy yilda ular 18 va 17 yoshga to‘ladi. Vashingtondagi Milliy hayvonot bog‘i ularning ijarasi uchun har yili Xitoyga 500 ming dollardan to‘laydi. Kelishuvga ko‘ra, Bey Bey va Bao Bao to‘rt yoshga to‘lganida Xitoyga qaytadi. Ularning ota-onasi esa 2020-yil oxirigacha AQShda qoladi.
Izoh (0)