Coca-Cola kompaniyasi Rossiya Federatsiyasini bosib olingan Qrim bilan tasvirlagan xarita uchun rasman uzr so‘radi. Bu haqda Ukrainaning AQShdagi elchixonasi ma’lumotiga tayanib, “Korrespondent.net” xabar beradi.
“6-yanvar kuni Ukrainaning AQShdagi elchixonasida Coca-Cola’ning Vashingtondagi ofisi rahbari K.Irvin bilan uchrashuv bo‘lib o‘tdi. Uchrashuv davomida u kompaniyaning Rossiyadagi vakilligi tomonidan Rossiya noqonuniy bosib olgan Qrim bilan aks ettirilgan xarita bilan bog‘liq anglashilmovchilik yuzasidan rasman uzr so‘radi”, — deyiladi xabarda.
Shuningdek, Irvin Coca-Cola kompaniyasining katta vitse-prezidenti Klayd Taggl tomonidan Ukrainaning AQShdagi elchisi Valeriy Chaliy nomiga yo‘llangan xatni taqdim etdi. Unda kompaniyaning roziligisiz va uni xabardor etmasdan mustaqil agentlik tomonidan chop etilgan mazkur xarita uchun uzr so‘ralgan.
Eslatib o‘tamiz, dastlab Coca-Cola ijtimoiy tarmoqlarida Rossiya xaritasi Qrim, Kaliningrad viloyati va Kuril orollarisiz bo‘lgan. Bu xarita chop etilgani uchun kompaniya kechirim so‘ragan va shundan so‘ng tarkibiga Qrim qo‘shilgan Rossiya xaritasini e’lon qilgan. Bu esa yarimorolni bosib olingan deb hisoblaydigan ukrainaliklar noroziligiga sabab bo‘lgan. Oxir-oqibat Coca-Cola ijtimoiy tarmoqlardan xaritani o‘chirib tashlagan edi.
Izoh (0)