Нью-Йоркда ахлатга ташлаб юборилган бир неча миллион долларлик бриллиантларнинг бир қисми топилди

Полиция Нью-Йоркдаги заргарлик дўконидан бир неча миллион долларлик бриллиантлар ўғирланишини фош этди. New York Post газетасининг маълум қилишича, ғилофда бўлган қимматбаҳо тошлар англашилмовчилик туфайли ташлаб юборилган. Улардан бир қисми ўз эгасига — J. Birnbaum хусусий фирмасига қайтарилди, дея хабар беради «ТАСС».

Терговда аниқланишига кўра, Манхэттендаги қўп қаватли бинода жойлашган заргарлик буюмлари дўкони бриллиантлар йўқолган кун бошқа қаватга кўчиб ўтган. Юкчилар қимматбаҳо тошлар жойлаштирилган учта кўзга ташланмас қутини кераксиз деб ҳисоблаб, ахлатга ташлаб юборган. Уларни 24 ноябрь куни бино қўриқчиси Уилфред Мартинес топиб, ўзига олиб қолган.

47 ёшли Мартинес бинонинг учинчи қаватига ўрнатилган кузатув камералари орқали пайқаб қолинди. 14 декабрь, душанба куни полиция уни ҳибсга олди. Қўриқчи сўроқ чоғида айбини тан олган ва 3,2 миллион доллар турадиган 17 қиротли бриллиант, қиймати пастроқ бўлган бир неча қимматбаҳо тош ва 10 минг доллар нақд пулни қайтариб берган. Қолган қимматбаҳо тошларни у J. Birnbaum дўкони жойлашган бинодаги бошқа заргарга ўтказишга улгурган экан.

Қўриқчи суд олдида жавоб берадиган бўлди, полиция эса эгаси 5 миллиондан 10 миллион долларгача баҳолаган қолган бриллиантларни қидирмоқда.