Misr kassatsiya sudi “Musulmon birodarlar” harakati vakillarining ularga nisbatan chiqarilgan hukmlarga apellyatsiyasini qondirdi va ishni qayta ko‘rib chiqishga yubordi. Bu haqda “TASS” xabar bermoqda.
Sud hammasi bo‘lib 13 kishi, jumladan, ayni paytda mamlakatda faoliyati taqiqlangan harakatning Misrdagi yetakchisi Muhammad Badiyga nisbatan o‘lim jazosi, shuningdek, “Musulmon birodarlar”ning 25 nafar faoliga chiqarilgan umrbod qamoq jazosini bekor qildi.
Eslatib o‘tamiz, shu yil mart oyida jinoiy ishlar bo‘yicha Qohira sudi Muhammad Badiy va uning tarafdorlaridan bir guruhini 2013-yilda mamlakatda hukumat almashgandan keyingi tartibsizliklarda ayblab, o‘lim jazosiga hukm qilgandi. O‘lim jazosi mamlakat oliy muftiysi tomonidan ma’qullanganidan so‘ng aprelda sud ham ushbu hukmlarni tasdiqlagan, shundan so‘ng sudlanuvchilar hukm ustidan shikoyat qilgandi.
Izoh (0)