АҚШнинг 22 та штатидаги бир нечта округлар ва 50 та шаҳарда жониворларнинг цирк шоуларидаги иштироки чекланмоқда ёки тўлиқ тақиқланмоқда, деб ёзади National Geographic. Бироқ бунгача ҳали ҳеч қайси штат бундай қонунни бутун ҳудуди учун жорий қилмаган эди.
Ушбу ғояни биринчи бўлиб Гавайи амалга оширади: Қишлоқ хўжалик департаменти ўтган ҳафта бир овоздан тегишли қонунни маъқуллади. Цирк, карнавал, ярмарка ва бошқа кўнгилочар тадбирларда «ишлаш» мажбуриятидан озод этиладиган жониворлар рўйхатига йирик мушуксимонлар, маймунлар, филлар, каркидонлар, бегемотлар, айиқлар, сиртлонлар ва тимсоҳлар киритилди.
Бундай чора Гавайида анчадан буён кутилаётган эди. Гап шундаки, Гонолулуда 1994 йили Тайк лақабли Африка фили томоша чоғида дрессировкачи ва унинг ёрдамчисини босиб-янчиб ташлаган, сўнг кўчага югуриб чиққан эди. Полиция қутурган филни таъқиб қилиб, унга 86 марта ўқ узган, натижада жонивор нобуд бўлган эди.
Ҳайвон ҳимоячилари Тайк аввал ҳам ақлдан озиш белгиларини намоён қилгани, бироқ цирк маъмурияти ишни босди-босди қилиб, вақтида чора кўрмаганини таъкидлаб келади.
Изоҳ (0)