Tomskdagi (Rossiya) mikrojarrohlik ilmiy-tekshirish instituti “Bolalar uchun yagona yurak” xayriya jamg‘armasi yordamida 130 ming yevro turadigan narkoz-nafas olish jihozini xarid qilishga muvaffaq bo‘ldi. Bu haqda Facebook’dagi “Lentach” sahifasi orqali xabar berilgan.
“Biz asosan shou-biznes vakillari va aktyorlar ko‘magida moliyalashtiriladigan Germaniyaning ‘Bolalar uchun yagona yurak’ xayriya jamg‘armasiga yordam so‘rab murojaat etdik. Loyihamiz qo‘llab-quvvatlandi, jumladan, kolumbiyalik xonanda Shakira va amerikalik qo‘shiqchi Jastin Timberleyk tomonidan ham”, — deya ta’kidlagan institut rahbari Vladimir Baytinger.
Baytingerning aytishicha, har yili ellikka yaqin rivojlanishida nuqsoni bo‘lgan rossiyalik bolalar bepul operatsiya qilinadigan “Tabassum qil” xayriya tadbiri uchun institut tomonidan rolik tayyorlangan. Mazkur rolikda klinika faoliyati uchun narkoz-nafas olish qurilmasi zarur ekanligi bildirilgan. Oldin muassasa bunday jihozni ijaraga olib ishlatishga majbur bo‘lgan.
Jamg‘arma tomonidan ajratilgan mablag‘ hisobiga xizmat muddati 25 yil bo‘lgan narkoz-nafas olish jihozi va kuzatuvchi monitor xarid qilingan.
Izoh (0)