Saxalin sudi Qodirovning g‘azabiga sabab bo‘lgan hukmni bekor qildi

Saxalin viloyat sudi Janubiy Saxalin sudining “Xudoga ibodat: uning ma’nosi va islomdagi o‘rni” kitobini ekstremistik deb tan olish haqidagi qarorini bekor qildi, deya xabar bermoqda “RBK”.

Sud qarori ustidan shikoyat qilgan Checheniston rahbari Ramzan Qodirovning vakili Said-Magomed Chapanov  Saxalin viloyat sudining qarori “butun jahon hamjamiyatining g‘alabasi” ekanligini aytdi.

Avvalroq Rossiyaning Janubiy Saxalin sudi sudyasi Natalya Perchenko prokuror Bilobrovesning da’vosiga asosan, ushbu kitobni “ekstremistik material” deb tan olgandi. Bunga kitobda Qur’onning “Al-Fotiha”, “Al-Jin” kabi suralaridan keltirilgan iqtiboslar sabab bo‘lgan.

Shundan so‘ng Qodirovning ko‘rsatmasiga muvofiq, sudyaning mazkur qarori ustidan apellyatsion shikoyat tayyorlandi, Checheniston rahbari Rossiyada “Injil, Qur’on va Tavrotga teginish taqiqlanadigan” federal qonun qabul qilinishiga ishonch bildirdi. Rossiya prezidenti Davlat dumasiga Injil, Qur’on va boshqa muqaddas kitoblar mazmun-mohiyati hamda ulardan olingan iqtiboslarni ekstremistik materiallar deb topishni taqiqlovchi qonun loyihasini kiritdi. Mazkur hujjat parlament tomonidan kuzgi sessiya oxiriga qadar ko‘rib chiqilishi mumkin.