Сахалин вилоят суди Жанубий Сахалин судининг «Худога ибодат: унинг маъноси ва исломдаги ўрни» китобини экстремистик деб тан олиш ҳақидаги қарорини бекор қилди, дея хабар бермоқда «РБК».
Суд қарори устидан шикоят қилган Чеченистон раҳбари Рамзан Қодировнинг вакили Саид-Магомед Чапанов Сахалин вилоят судининг қарори «бутун жаҳон ҳамжамиятининг ғалабаси» эканлигини айтди.
Аввалроқ Россиянинг Жанубий Сахалин суди судьяси Наталья Перченко прокурор Билобровеснинг даъвосига асосан, ушбу китобни «экстремистик материал» деб тан олганди. Бунга китобда Қуръоннинг «Ал-Фотиҳа», «Ал-Жин» каби сураларидан келтирилган иқтибослар сабаб бўлган.
Шундан сўнг Қодировнинг кўрсатмасига мувофиқ, судьянинг мазкур қарори устидан апелляцион шикоят тайёрланди, Чеченистон раҳбари Россияда «Инжил, Қуръон ва Тавротга тегиниш тақиқланадиган» федерал қонун қабул қилинишига ишонч билдирди. Россия президенти Давлат думасига Инжил, Қуръон ва бошқа муқаддас китоблар мазмун-моҳияти ҳамда улардан олинган иқтибосларни экстремистик материаллар деб топишни тақиқловчи қонун лойиҳасини киритди. Мазкур ҳужжат парламент томонидан кузги сессия охирига қадар кўриб чиқилиши мумкин.
Изоҳ (0)