Misrda shiddatli yomg‘irlar keltirib chiqargan toshqinlar oqibatida kamida 11 kishi halok bo‘ldi. Mamlakat poytaxti Qohira shimolidagi Buxayra provinsiyasida sakkiz kishi tunda uylarini suv bosishi tufayli nobud bo‘lgan, uch kishi tok urishidan o‘lgan. Bu haqda “TASS” xabar bermoqda.
3-noyabr, seshanba kechki paytdan beri tinmayotgan yomg‘irlar sabab Aleksandriya shahri yana suv ostida qolgan. Uning ayrim hududlarida suv sathi bir metrgacha ko‘tarilgan, elektr kabellari uzilishi va qisqa tutashuvlar tufayli elektr energiyasi berilishi to‘xtagan. Aleksandriya provinsiyasi rasmiylari favqulodda holat e’lon qildi.
4-noyabr, chorshanba kuni sel yopirilishi tufayli Qohira va Xurgada, Safaga kurort shaharlari joylashgan Qizil dengiz provinsiyasi o‘rtasida avtomobil qatnovi to‘xtagan, yo‘llarda yuzlab mashinalar to‘planib qolgan. Sinoptiklarning bashorati taskin beradigan emas — yaqin kunlar mobaynida mamlakatda haroratning pasayishi va kuchli yomg‘irlar kutilmoqda.
Izoh (0)