O‘zbekiston Fanlar akademiyasi Astronomiya instituti direktori, professor Shuhrat Egamberdiyev Fransiyaning Lojuvard qirg‘oq observatoriyasi tomonidan ta’sis etilgan La médaille de l’ADIONS medali bilan taqdirlandi. Bu haqda “Pisma o Tashkente” ma’lum qildi.
Shtab-kvartirasi Fransiyaning Nitssa universitetida joylashgan IRIS (International Research on the Interior of the Sun) xalqaro dasturi astronomiya sohasidagi o‘zbek-fransuz hamkorligining muhim yo‘nalishlaridan biri bo‘lgan. Mazkur dastur bo‘yicha kuzatuvlar 1989-yilda, professor Egamberdiyev boshchiligidagi bir guruh tadqiqotchilar tomonidan Toshkentdan 80 kilometr uzoqlikdagi Kumbel tog‘ida xalqaro tarmoqdagi birinchi stansiya ishga tushirilgach boshlangan.
Olimning o‘zi 1987—2002-yillarda IRIS loyihasining faol a’zosi bo‘lgan, ma’lumotlarni qayta ishlash va tahlil etish guruhi raisi etib saylangan. IRIS dasturi faoliyat ko‘rsatgan 11 yil davomida yig‘ilgan barcha manbalarning 40 foizini taqdim etgan Kumbeldagi muasssasa uning sa’y-harakatlari bilan tarmoqning eng sermahsul stansiyasiga aylandi. O‘zbekistonda bu dastur doirasida Quyoshning global akustik tebranishlari bo‘yicha yangi ilmiy yo‘nalishga asos solindi.
Joriy yilda Nitssa universiteti kengashi observatoriya faoliyatiga katta hissa qo‘shgan besh nomzod orasidan o‘zbekistonlik olim izlanishlariga yuqori baho berib, nufuzli mukofot bilan taqdirlashga qaror qildi.
Izoh (0)