Chorvachilikka ixtisoslashgan xo‘jaliklar uchun rotorli-diskli don maydalagich qurilmasi yasaldi

Toshkent davlat agrar universiteti “Qishloq xo‘jaligini mexanizatsiyalash” fakulteti olimlari tomonidan chorvachilikka ixtisoslashgan fermer, dehqon va shaxsiy xo‘jaliklari uchun kichik hajmdagi “Rotorli-diskli don maydalagich” qurilmasini ishlab chiqdi. Bu haqda universitet qoshidagi “Innovatsiya va integratsiya Markazi” xodimlari “Daryo”ga xabar berdi.

Qurilma asoschilari don maydalagichni yaratishda o‘z oldilariga quyidagi vazifalarni ijobiy hal etishga asosiy e’tiborlarini qaratdi va o‘z maqsadlariga erishdi:

• energetik ko‘rsatkichlarini pasaytirish;
• sifat ko‘rsatkichlarini yaxshilash;
• iqtisodiy samaraga erishish.

Toshkent davlar agrar universiteti olimlari taklif etayotgan rotorli-diskli don maydalagich, kichik fermer, dehqon va shaxsiy xo‘jaliklar uchun mo‘ljallangan bo‘lib, metall va energiya sig‘imi kam, bir va uch fazali elektr tarmoqlarida ishlatilishi mumkin, nisbiy energiya sarfi jahon standartlariga javob beradi va 0,005 kVt*soat/kg dan oshmaydi. Sifat ko‘rsatkichlari bo‘yicha maydalagichda maydalangan don zarrachalari o‘lchamlarining bir xilligini ta’minlashi bilan belgilanadi. Maydalagich IAF № 20040161 raqamli patenti bilan himoyalangan. Maydalagichning rotor va stator oralig‘idagi tirqishini o‘zgartirish orqali mollar va parrandalarning turi, guruhiga qarab kerakli maydalikda maydalangan yorma olish imkonini beradi.

Joriy yilning 19—21-may kunlari “O‘zekspomarkaz”da bo‘lib o‘tgan “Innovatsion g‘oyalar, texnologiyalar va loyihalar VIII Respublika yarmarkasi”da ushbu qurilmaning sanoat nusxasi namoyish etildi va yarmarkaga kelgan ko‘plab fermer xo‘jaliklari rahbarlarining qiziqishiga sabab bo‘ldi. Yarmarka doirasida ushbu qurilmaga buyurtmalar olinib, 30 million so‘mlik shartnomalar imzolandi.