Ўзбекистон Фанлар академияси Астрономия институти директори, профессор Шуҳрат Эгамбердиев Франциянинг Ложувард қирғоқ обсерваторияси томонидан таъсис этилган La médaille de l’ADIONS медали билан тақдирланди. Бу ҳақда «Письма о Ташкенте» маълум қилди.
Штаб-квартираси Франциянинг Ницца университетида жойлашган IRIS (International Research on the Interior of the Sun) халқаро дастури астрономия соҳасидаги ўзбек-француз ҳамкорлигининг муҳим йўналишларидан бири бўлган. Мазкур дастур бўйича кузатувлар 1989 йилда, профессор Эгамбердиев бошчилигидаги бир гуруҳ тадқиқотчилар томонидан Тошкентдан 80 километр узоқликдаги Кумбель тоғида халқаро тармоқдаги биринчи станция ишга туширилгач бошланган.
Олимнинг ўзи 1987—2002 йилларда IRIS лойиҳасининг фаол аъзоси бўлган, маълумотларни қайта ишлаш ва таҳлил этиш гуруҳи раиси этиб сайланган. IRIS дастури фаолият кўрсатган 11 йил давомида йиғилган барча манбаларнинг 40 фоизини тақдим этган Кумбелдаги муасссаса унинг саъй-ҳаракатлари билан тармоқнинг энг сермаҳсул станциясига айланди. Ўзбекистонда бу дастур доирасида Қуёшнинг глобал акустик тебранишлари бўйича янги илмий йўналишга асос солинди.
Жорий йилда Ницца университети кенгаши обсерватория фаолиятига катта ҳисса қўшган беш номзод орасидан ўзбекистонлик олим изланишларига юқори баҳо бериб, нуфузли мукофот билан тақдирлашга қарор қилди.
Изоҳ (0)