Avstraliya bosh vaziri Malkolm Ternbull mamlakatda ritsarlik unvoni berilishi bekor etilishini e’lon qildi. Bu haqda “TASS” xabar bermoqda.
“Vazirlar mahkamasi ritsarlik zamonaviy mukofotlash tizimiga mos kelmasligi to‘g‘risidagi fikrga qo‘shildi”, deya ta’kidlagan Ternbull rasman davlat rahbari hisoblanuvchi Buyuk Britaniya qirolichasi Avstraliya hukumatining ushbu unvonni bekor qilish haqidagi tavsiyasini ma’qullaganini bildirdi.
Avstraliya davlat mukofotlari tizimi 1975-yilda shakllantirilgan, ungacha mamlakat fuqarolari Britaniya ordenlari bilan taqdirlangan. Avvaliga mazkur tizimda ritsarlik unvoni berilishi ham bo‘lgan, biroq 1986-yilda bekor qilingandi.
2014-yil boshida o‘sha paytdagi bosh vazir Toni Ebbott ritsarlar va xonimlar unvonlarini berish marosimini tikladi. 2015-yil yanvarida Buyuk Britaniya qirolichasining turmush o‘rtog‘i shahzoda Filipp Avstraliya ritsari nomiga loyiq ko‘rildi. Ebbottning mazkur qarori Avstraliya jamoatchiligi va hukmron Liberal partiya noroziligiga sabab bo‘ldi. Ma’lum bo‘lishicha, Ebbott mukofotlash to‘g‘risidagi qarorni yakka o‘zi, hech kim bilan maslahatlashmay qabul qilgan.
Eslatib o‘tamiz, Avstraliyaning yangi bosh vaziri mamlakatni respublika deb e’lon qilish tarafdori hisoblanadi.
Izoh (0)