Австралия бош вазири Малколм Тернбулл мамлакатда рицарлик унвони берилиши бекор этилишини эълон қилди. Бу ҳақда «ТАСС» хабар бермоқда.
«Вазирлар маҳкамаси рицарлик замонавий мукофотлаш тизимига мос келмаслиги тўғрисидаги фикрга қўшилди», дея таъкидлаган Тернбулл расман давлат раҳбари ҳисобланувчи Буюк Британия қироличаси Австралия ҳукуматининг ушбу унвонни бекор қилиш ҳақидаги тавсиясини маъқуллаганини билдирди.
Австралия давлат мукофотлари тизими 1975 йилда шакллантирилган, унгача мамлакат фуқаролари Британия орденлари билан тақдирланган. Аввалига мазкур тизимда рицарлик унвони берилиши ҳам бўлган, бироқ 1986 йилда бекор қилинганди.
2014 йил бошида ўша пайтдаги бош вазир Тони Эбботт рицарлар ва хонимлар унвонларини бериш маросимини тиклади. 2015 йил январида Буюк Британия қироличасининг турмуш ўртоғи шаҳзода Филипп Австралия рицари номига лойиқ кўрилди. Эбботтнинг мазкур қарори Австралия жамоатчилиги ва ҳукмрон Либерал партия норозилигига сабаб бўлди. Маълум бўлишича, Эбботт мукофотлаш тўғрисидаги қарорни якка ўзи, ҳеч ким билан маслаҳатлашмай қабул қилган.
Эслатиб ўтамиз, Австралиянинг янги бош вазири мамлакатни республика деб эълон қилиш тарафдори ҳисобланади.
Изоҳ (0)