“Apollon-16” fazoviy dasturining a’zosi — amerikalik astronavt Charlz Dyuk 1972-yil 20-aprel kuni Yerning tabiiy yo‘ldoshi — Oy sathiga qadam qo‘ygan eng yosh insonga aylangan edi. Tengrinews’ning yozishicha, amerikalik fazogir Oyda unga biror kun qadam bosadiganlar uchun xabarli fotosurat qoldirgan.
Xabar berishlaricha, oilaviy fotosuratda Dyuk o‘z ayoli va ikki o‘g‘li qurshovida tasvirlangan. Fotosuratning orqa tomonida esa astronavt: “Bu Yer sayyorasida yashovchi, 1972-yil 20-aprel kuni Oyga qo‘ngan astronavt Charli Dyukning oilasi”, — deb yozilgan qayd qoldirgan.
Astronavtning bayon qilishicha, u oilasi bilan uzoq vaqt birga bo‘la olmasligi sabab, farzandlariga ularni ham virtual tarzda Oyga olib borishga va’da bergan. Termoplyonkaga o‘ralgan fotosurat Oy sathiga qo‘yilganidan so‘ng, astronavt oilaviy fotosurat haqiqatan ham Yerning tabiiy yo‘ldoshida qolganini farzandlariga isbotlash maqsadida, fotosurat turgan joyni rasmga olgan.
“Oane.ws” nashrining qayd etishicha, oradan 43 yil o‘tdi va oilaviy fotoning ko‘rinishi yaxshi bo‘lmasligi mumkin, chunki Oyda tungi vaqtlarda havo harorati keskin sovib ketadi. Fotosuratning holatini Oy atrofida harakatlanayotgan sun’iy yo‘ldoshlar orqali ham kuzatib, bilib bo‘lmaydi — oilaviy surat haddan tashqari kichkina.
Izoh (0)