Duma Sergey Shoygudan Suriyada rossiyalik askar halok bo‘lishi sabablarini batafsil o‘rganishni so‘ramoqda

Rossiya Davlat dumasi deputati Valeriy Rashkin mudofaa vaziri Sergey Shoyguga Suriyada halok bo‘lgan askar Vadim Kostenko o‘limi sabablarini batafsil tekshirish yuzasidan so‘rov jo‘natdi. Bu haqda “Gazeta.ru” xabar bermoqda.

“Suriya hududida rossiyalik askar halok bo‘lgani jamiyatda bezovtalik uyg‘otmoqda. Sizdan Vadim Kostenko o‘limi tafsilotlarini batafsil o‘rganish, uning natijalaridan jamoatchilikni xabardor qilish, Rossiya Qurolli kuchlari harbiy xizmatchilari hayoti va salomatligi qanchalik ishonchli himoya qilinayotgani haqida axborot berishingizni so‘raymiz”, — deyiladi mazkur so‘rovda.

Deputatning ta’kidlashicha, Kostenkoning ota-onasi va yaqinlari askar o‘z joniga qasd etganiga ishonmasliklarini ma’lum qilgan.

Eslatib o‘tamiz, rossiyalik askar 28-oktabr, chorshanba kuni o‘zi tug‘ilib-o‘sgan Krasnodar o‘lkasidagi Grechanaya Balka qishlog‘ida dafn etildi.