BMT Afg‘oniston va Pokistonda kamida 220 kishining o‘limiga sabab bo‘lgan 7,5 magnitudali zilzila oqibatlarini barataraf etishga yordam berishga tayyor. Bu haqda xalqaro tashkilot bosh kotibining rasmiy vakili Stefan Dyujarrik ma’lum qildi, deya xabar berdi “TASS”.
“BMT tegishli talab bo‘lgan taqdirda ko‘mak berishga tayyor. Gumanitar agentliklarimiz zarur bo‘lganda aholiga tarqatish uchun zaxiralarni hozirlay boshladi”, — deya ta’kidlagan Dyujarrik.
Oxirgi ma’lumotlarga ko‘ra, Pokistonda 140 kishi tabiiy ofat qurboni bo‘lgan, mingdan ziyod kishi jarohatlangan. Afg‘onistonda esa 80ga yaqin kishi halok bo‘lgan, 200 dan ortiq odam yaralangan.
Eslatib o‘tamiz, Afg‘onistonning Hindikush tog‘larida yuz bergan yer silkinishi O‘zbekistonda ham sezilgan. Favqulodda vaziyatlar vazirligi matbuot xizmati sodir bo‘lgan zilzila natijasida O‘zbekistonda qurbon bo‘lganlar va vayronagarchiliklar qayd etilmaganini ma’lum qilgan.
Izoh (0)