Amerika huquq-tartibot idoralari Markaziy razvedka boshqarmasi (MRB) direktori Jon Brennan va AQSh milliy xavfsizlik vaziri Jey Jonsonning internet akkauntlari buzilganligi to‘g‘risidagi ma’lumotlarni tekshirmoqda. Bu haqda New York Post manbalariga tayanib, “TASS” xabar bermoqda.
Gazeta ma’lumotlariga ko‘ra, MRB rahbarining AOL (America online) kompaniyasi serveridagi akkauntini buzib ochgan maktab o‘quvchisi Brennanning maxfiy axborotlar bilan tanishish uchun to‘ldirgan 47 betli so‘rovnomasi, terrorchilikda gumon qilinayotgan shaxslarni “ayovsiz so‘roq qilish uslublari” hamda Amerika razvedkasining o‘nlab yuqori lavozimdagi xodimlari to‘g‘risidagi shaxsiy ma’lumotlar bilan tanishish imkoniyatiga ega bo‘lgan.
Nashr bilan telefon orqali o‘tkazilgan bir necha suhbatlar chog‘ida o‘z nomini oshkor etmagan xaker “amerikalik maktab o‘quvchisi ekanligi, musulmon emasligi, AQSh tashqi siyosatiga qarshi bo‘lgani va Falastinni qo‘llab-quvvatlashi tufayli shunday harakatga qo‘l urgani”ni ta’kidlagan.
Amerika huquq-tartibot idoralari tomonidan olib borilayotgan surishtiruvlar nihoyasiga yetgach, o‘quvchiga nisbatan jinoiy ish ochilishi mumkinligi aytilmoqda.
Izoh (0)