NASA mutaxassislari 31-oktabr kuni Yerga juda yaqin masofada uchib o‘tadigan ulkan asteroidni aniqladi. 2015 TB145 nomini olgan osmon jismi Gavayi orollaridagi Pan-STARRS avtomatik tizimi tomonidan aniqlandi, deb xabar beradi Gizmag.
Olimlar asteroid Yerdan 499 ming kilometr uzoqlikdan uchib o‘tishini qayd etdi, bu Yerdan Oygacha bo‘lgan masofadan 1,3 baravar katta degani. Asteroidning tezligi soniyasiga 35 kilometrni tashkil etadi. Taqqoslash uchun, 2013-yil Chelyabinskga tushgan meteorit soniyasiga 19 kilometr tezlik bilan harakatlangan, uning o‘lchami esa 17 metrdan oshmagan edi.
Mutaxassislar hisob-kitobiga ko‘ra, 2015 TB145 asteroidining diametri 280 dan 620 metrgacha yetishi mumkin. Uning noodatiy trayektoriyasi va yuqori tezligi sabab NASA olimlari asteroidni oldinroq payqamagan. Shunga qaramay, ular osmon jismining Yerga xavf solmasligini ta’kidlamoqda.
Bunday katta o‘lchamdagi keyingi asteroid — 1999 AN10 Yer yaqinidan 2027-yilda uchib o‘tadi. Oxirgi marta bunday osmon jismi Yerga bunchalik yaqin masofada 2006-yilda uchib o‘tgandi.
Izoh (0)