Ukrainaning sobiq prezidenti Viktor Yanukovich inson huquqlari bo‘yicha Yevropa sudiga Ukrainaga qarshi da’vo kiritdi. Bu haqda Buyuk Britaniyaning Joseph Hage Aaronson LLP advokatlik kompaniyasi reliziga tayanib, Yanukovichning matbuot kotibi Yuriy Kirasir ma’lum qildi, deya xabar beradi “Korrespondent.net”.
“Yanukovichga nisbatan ko‘plab asossiz jinoiy ishlar qo‘zg‘atilishi, ularni sudda adolatli va mustaqil ko‘rib chiqilishiga bo‘lgan huquqining buzilishi, amaldagi hokimiyat tomonidan muxolif sifatida siyosiy ta’qib etilishi da’vo qo‘zg‘ashga asos bo‘ldi”, – deyiladi xabarda.
“Inson huquqlari bo‘yicha Yevropa sudiga da’vo kiritilishini Yanukovich Ukraina rahbariyati unga nisbatan ayblov hukmi chiqarish maqsadida sud idoralariga tazyiq o‘tkazayotganligi bilan izohlamoqda”, — deya ta’kidlaydi sobiq prezidentning advokati.
Eslatib o‘tamiz, Kiyevdagi Pecherskiy sudi 2015-yil 27-iyulda Yanukovichga nisbatan sirtdan hukm chiqarish jarayonini boshlash to‘g‘risida qaror qabul qilgan, Ukraina bosh prokuraturasi esa uni ayni paytdagi yashash joyida (Rostov) yoki videokonferensiya tartibida ko‘rsatma berishini rad etgandi.
Izoh (0)