Америка ҳуқуқ-тартибот идоралари Марказий разведка бошқармаси (МРБ) директори Жон Бреннан ва АҚШ миллий хавфсизлик вазири Жей Жонсоннинг интернет аккаунтлари бузилганлиги тўғрисидаги маълумотларни текширмоқда. Бу ҳақда New York Post манбаларига таяниб, «ТАСС» хабар бермоқда.
Газета маълумотларига кўра, МРБ раҳбарининг AOL (America online) компанияси серверидаги аккаунтини бузиб очган мактаб ўқувчиси Бреннаннинг махфий ахборотлар билан танишиш учун тўлдирган 47 бетли сўровномаси, террорчиликда гумон қилинаётган шахсларни «аёвсиз сўроқ қилиш услублари» ҳамда Америка разведкасининг ўнлаб юқори лавозимдаги ходимлари тўғрисидаги шахсий маълумотлар билан танишиш имкониятига эга бўлган.
Нашр билан телефон орқали ўтказилган бир неча суҳбатлар чоғида ўз номини ошкор этмаган хакер «америкалик мактаб ўқувчиси эканлиги, мусулмон эмаслиги, АҚШ ташқи сиёсатига қарши бўлгани ва Фаластинни қўллаб-қувватлаши туфайли шундай ҳаракатга қўл ургани»ни таъкидлаган.
Америка ҳуқуқ-тартибот идоралари томонидан олиб борилаётган суриштирувлар ниҳоясига етгач, ўқувчига нисбатан жиноий иш очилиши мумкинлиги айтилмоқда.
Изоҳ (0)