Filippin shimolida Koppu tayfuni qurbonlari soni 14 kishiga yetdi. Bu haqda “RIA Novosti” xabar bermoqda.
Mahalliy ma’muriyat ma’lumotlariga ko‘ra, yetti kishi qayiqning ag‘darilishi natijasida dengizda cho‘kib ketgan, uch kishi daraxtlar ag‘anashi va tosh ko‘chishidan halok bo‘lgan, ikki kishi esa Nueva-Esixa viloyatidagi suv toshqinlari qurboni bo‘lgan.
Shuningdek, qutqaruv xizmatlari tomonidan berilgan ma’lumotga ko‘ra, Benget viloyatida yuz bergan ko‘chki oqibatida bir kishi halok bo‘lgan, Tarlak viloyatida esa bir kishi tok urishi natijasida vafot etgan.
DPA agentligi xabariga ko‘ra, Iloilo shahri yaqinida tayfun natijasida motorli qayiq suv ostida qolgan, sohil qo‘riqlash xizmati 32 kishini qutqarib qolgan, yana ikki kishi qidirilmoqda.
Avvalroq, Koppu to‘foni yopirilishi munosabati bilan Filippindan 10 ming kishi xavfsiz hududga ko‘chirilgani haqida xabar berilgan edi. Ma’lumot uchun, har yili iyundan dekabrga qadar Filippinga 20 ga yaqin bo‘ron va to‘fonlar yopiriladi.
Izoh (0)