Turkiya bosh vaziri Ahmet Davuto‘g‘lining ma’lum qilishicha, Turkiya harbiy-havo kuchlari tomonidan urib tushirilgan dron Rossiyada ishlab chiqarilgan. Bu haqda “RIA Novosti” xabar bermoqda.
Turkiya harbiy-havo kuchlari samolyotlari 16-oktabr, juma kuni Suriya tomondan mamlakat havo bo‘shliqlariga buzib kirgan noma’lum samolyotga hujum qilib, urib tushirgandi. Keyinroq Turkiya qurolli kuchlari bosh shtabi urib tushirilgan obyekt uchuvchisiz parvoz qiluvchi qurilma (dron) ekanligini ma’lum qilgandi.
“Turkiya hududida urib tushirilgan dron Rossiyada ishlab chiqarilgan. Biroq Rossiya tomoni bu qurilma ularga tegishli emasligini ma’lum qildi. U Bashar Asad tuzumiga, suriyalik kurdlarga yoki boshqa kuchlarga tegishli bo‘lishi mumkin”, — dedi Davuto‘g‘li.
Turkiya bosh vazirining umid bildirishicha, Rossiya mazkur hodisadan kelib chiqib, Suriyadagi harbiy operatsiyani olib borishda yanada ehtiyotkor bo‘ladi.
16-oktabr, juma kuni ijtimoiy tarmoqlarda Turkiya bosh shtabiga asoslanib, “Sankt-Peterburg texnologik markazi” (“Orlan”) tomonidan ishlab chiqarilgani aytilgan dron suratlari tarqalib ketdi. Rossiya kompaniyasi raddiya bilan chiqish qilib, suratlar “o‘xshamagan axborot ig‘vosiga ko‘proq o‘xshashini” qayd etib o‘tdi.
Rossiya Mudofaa vazirligining rasmiy vakili Igor Konashenkov esa Rossiyaning Suriyadagi barcha samolyotlari belgilangan vazifalarni bajargach, aviabazaga qaytgani, dronlar esa odatdagi tartibda faoliyat olib borayotganini ma’lum qildi.
Izoh (0)