Jahon sog‘liqni saqlash tashkiloti (JSST) Gvineyada Ebola virusi bilan zaharlanish bilan bog‘liq ikki holatni qayd etdi. Bu haqda “TASS” xabar bermoqda.
Reuters agentligining JSST ma’lumotlariga asoslanib xabar berishicha, holatlarning biri mamlakat g‘arbidagi Forekarya shahrida, ikkinchisi esa poytaxt Konakrida qayd etilgan.
JSST 14-oktabr kuni so‘nggi ikki haftadan beri G‘arbiy Afrikada Ebola virusini yuqtirish bilan bog‘liq birorta hodisa qayd etilmagani haqida hisobot bergandi.
Ayni vaqtda, mutaxassislar Gvineyada sog‘lom kishilar va Ebola bilan kasallanganlar o‘rtasida 150 muloqot yuz bergani, ulardan 118 tasi “yuqori darajada xavfli” ekanligini qayd etib o‘tgandi.
Ebola virusi sabab qo‘zg‘agan xalqaro epidemiyasi oqibatida jahon bo‘ylab 11 312 kishi halok bo‘ldi, 28 490 kishi kasallandi. Xususan, Gvineyada 3 800 kishi kasallanib, 2 534 kishi vafot etgan.
G‘arbiy Afrikaning boshqa mamlakatlari, xususan, Liberiyada 4 808 kishi halok bo‘ldi, 10 672 kishi kasallandi, Serra-Leoneda 3 955 kishi vafot etib, 13 982 kishi kasallandi.
Ebola bilan kasallanish holatlari, shuningdek, Mali, Nigeriya, Senegal, Italiya, Ispaniya, Buyuk Britaniya va AQShda ham qayd etildi. Biroq mazkur mamlakatlarning aksariyatida kasallanganlar soni 10 kishidan oshmadi.
Izoh (0)