Жаҳон соғлиқни сақлаш ташкилоти (ЖССТ) Гвинеяда Эбола вируси билан заҳарланиш билан боғлиқ икки ҳолатни қайд этди. Бу ҳақда «ТАСС» хабар бермоқда.
Reuters агентлигининг ЖССТ маълумотларига асосланиб хабар беришича, ҳолатларнинг бири мамлакат ғарбидаги Форекаря шаҳрида, иккинчиси эса пойтахт Конакрида қайд этилган.
ЖССТ 14 октябрь куни сўнгги икки ҳафтадан бери Ғарбий Африкада Эбола вирусини юқтириш билан боғлиқ бирорта ҳодиса қайд этилмагани ҳақида ҳисобот берганди.
Айни вақтда, мутахассислар Гвинеяда соғлом кишилар ва Эбола билан касалланганлар ўртасида 150 мулоқот юз бергани, улардан 118 таси «юқори даражада хавфли» эканлигини қайд этиб ўтганди.
Эбола вируси сабаб қўзғаган халқаро эпидемияси оқибатида жаҳон бўйлаб 11 312 киши ҳалок бўлди, 28 490 киши касалланди. Хусусан, Гвинеяда 3 800 киши касалланиб, 2 534 киши вафот этган.
Ғарбий Африканинг бошқа мамлакатлари, хусусан, Либерияда 4 808 киши ҳалок бўлди, 10 672 киши касалланди, Серра-Леонеда 3 955 киши вафот этиб, 13 982 киши касалланди.
Эбола билан касалланиш ҳолатлари, шунингдек, Мали, Нигерия, Сенегал, Италия, Испания, Буюк Британия ва АҚШда ҳам қайд этилди. Бироқ мазкур мамлакатларнинг аксариятида касалланганлар сони 10 кишидан ошмади.
Изоҳ (0)