O‘zbekiston avtomobil yo‘llari piyodalar uchun yaxshi moslashtirilmagan va piyodalar xavfsizligini ta’minlash bo‘yicha shoshilinch choralar ko‘rish zarur. Bu haqda “Gazeta.uz” internet-nashri yozmoqda.
Internet-nashr o‘z xabariga 2015-yil bahorida Toshkent shahrining Parkent ko‘chasida ikki maktab oldida joylashgan piyodalar o‘tish joyidagi holat tasvirlangan videorolikni ilova qilgan. Qayd etilgan maktablardan biri ko‘zi ojiz bolalar uchun mo‘ljallangan bo‘lib, joyni bildirish maqsadida o‘rnatilgan “Piyodalar o‘tish joyi” axborot-ishora belgisi ostiga qo‘shimcha “Ko‘zi ojiz piyodalar” axborot belgisi o‘rnatilgan.
Shunga qaramay, videorolikda o‘quvchi qiz avtomobillar oqimi katta bo‘lgan yo‘lning narigi betiga o‘tishi uchun 1 daqiqa 27 soniya vaqt sarflashga majbur bo‘lganini ko‘rish mumkin. Dastlab e’tiborni piyodalar o‘tish joyi va trotuar oralig‘idagi usti ochiq ariq tortadi — ko‘zi ojiz piyodalar ham o‘tishi mumkin bo‘lgan bu joyda ariqning usti ochiq qolgani piyodalarga ma’lum bir qiyinchiliklarni keltirib chiqarishi shubhasiz.
O‘quvchi qiz rolikning 30-soniyasida ikkilana-ikkilana piyodalar o‘tish joyiga birinchi qadamni qo‘yadi. So‘ng keyingi 17 soniya davomida ikkinchi oyog‘ini ham piyodalar o‘tish joyiga qo‘yishga shaylanadi-yu, biroq avtomobillar oqimi to‘xtay demagani uchun, yana ariq ustidan o‘tib, ortga qaytadi. Oxiri 52-soniyada u piyodalar o‘tish joyiga to‘liq chiqadi va asta yo‘lning o‘rtasi tomon harakatlana boshlaydi va 69-soniyada shahdam qadamlar bilan ajratuvchi chiziqqa yetib boradi.
Qarama-qarshi qatnov qismidan narigi tomonga o‘tib olish uchun yana 18 soniya kerak bo‘ladi. Qiz ariqning ustidan xatlab o‘tgani (videorolikning 52-soniyasi)dan keyin uni kamida 19 ta avtomobil o‘tkazib yubormaganini ko‘rish mumkin. Ahamiyatli tomoni, yo‘l o‘rtasida piyodalar uchun “xavfsizlik orolchasi” yo‘q va bu holat yo‘lni katta qiyinchilik bilan kesib o‘tayotgan piyodalarning hayoti va salomatligini jiddiy xavf ostida qoldiradi.
“Mazkur videorolik avtomobillarga to‘la yo‘llarda tartibga solinmagan piyodalar o‘tish joylari tobora ko‘payib borayotgan poytaxtimizda piyodalarga bo‘lgan munosabatni har qanday so‘zdan ko‘ra yaxshiroq ifodalab bera oladi”, — deb yozadi “Gazeta.uz”.
Izoh (0)