Тошкентдаги кўзи ожиз ўқувчилар мактаби олдидаги пиёдалар ўтиш жойидан соғлом ўқувчи бир ярим дақиқада ўтди

Ўзбекистон автомобиль йўллари пиёдалар учун яхши мослаштирилмаган ва пиёдалар хавфсизлигини таъминлаш бўйича шошилинч чоралар кўриш зарур. Бу ҳақда «Газета.uz» интернет-нашри ёзмоқда.

Интернет-нашр ўз хабарига 2015 йил баҳорида Тошкент шаҳрининг Паркент кўчасида икки мактаб олдида жойлашган пиёдалар ўтиш жойидаги ҳолат тасвирланган видеороликни илова қилган. Қайд этилган мактаблардан бири кўзи ожиз болалар учун мўлжалланган бўлиб, жойни билдириш мақсадида ўрнатилган «Пиёдалар ўтиш жойи» ахборот-ишора белгиси остига қўшимча «Кўзи ожиз пиёдалар» ахборот белгиси ўрнатилган.

Шунга қарамай, видеороликда ўқувчи қиз автомобиллар оқими катта бўлган йўлнинг нариги бетига ўтиши учун 1 дақиқа 27 сония вақт сарфлашга мажбур бўлганини кўриш мумкин. Дастлаб эътиборни пиёдалар ўтиш жойи ва тротуар оралиғидаги усти очиқ ариқ тортади — кўзи ожиз пиёдалар ҳам ўтиши мумкин бўлган бу жойда ариқнинг усти очиқ қолгани пиёдаларга маълум бир қийинчиликларни келтириб чиқариши шубҳасиз.

Ўқувчи қиз роликнинг 30-сониясида иккилана-иккилана пиёдалар ўтиш жойига биринчи қадамни қўяди. Сўнг кейинги 17 сония давомида иккинчи оёғини ҳам пиёдалар ўтиш жойига қўйишга шайланади-ю, бироқ автомобиллар оқими тўхтай демагани учун, яна ариқ устидан ўтиб, ортга қайтади. Охири 52-сонияда у пиёдалар ўтиш жойига тўлиқ чиқади ва аста йўлнинг ўртаси томон ҳаракатлана бошлайди ва 69-сонияда шаҳдам қадамлар билан ажратувчи чизиққа етиб боради.

Қарама-қарши қатнов қисмидан нариги томонга ўтиб олиш учун яна 18 сония керак бўлади. Қиз ариқнинг устидан хатлаб ўтгани (видеороликнинг 52-сонияси)дан кейин уни камида 19 та автомобиль ўтказиб юбормаганини кўриш мумкин. Аҳамиятли томони, йўл ўртасида пиёдалар учун «хавфсизлик оролчаси» йўқ ва бу ҳолат йўлни катта қийинчилик билан кесиб ўтаётган пиёдаларнинг ҳаёти ва саломатлигини жиддий хавф остида қолдиради.

«Мазкур видеоролик автомобилларга тўла йўлларда тартибга солинмаган пиёдалар ўтиш жойлари тобора кўпайиб бораётган пойтахтимизда пиёдаларга бўлган муносабатни ҳар қандай сўздан кўра яхшироқ ифодалаб бера олади», — деб ёзади «Газета.uz».