Germaniya hukumati qochoqlarning nemis jamiyatiga qo‘shilishi oson bo‘lishi uchun mamlakat konstitutsiyasining dastlabki 20 moddasini arab tiliga tarjima qildi. Bu haqda “Yevropeyskaya pravda” xabar bermoqda.
“Bu yerga kelayotgan odamlar nafaqat nemis tilini o‘rganishlari, balki birgalikda qanday qoidalar asosida yashashlarini ham bilishlari kerak. Konstitutsiyamizning dastlabki 20 moddasi bizning madaniyatimizni shakllantirgan qoidalardir, bunga ishonchim komil”, — dedi Germaniya vitse-kansleri Zigmar Gabriel.
Qochoqlar orasida tarqatish maqsadida arab tilida 10 ming nusxada chiqarilgan konstitutsiyaning dastlabki moddalarida fuqaroning huquq va majburiyatlari haqida so‘z boradi. Ma’lumot uchun, Germaniya konstitutsiyasi 1949-yili qabul qilingan.
“Germaniyaga kelayotganlarning hech biri dini yoki shaxsiy hayotini o‘zgartirishga majbur qilinmaydi. Biroq, demokratik jamiyatimizning asosiy tamoyillari barchaga taalluqli ekanligi — madaniyatimizning bir qismidir”, — deya qo‘shimcha qildi Zigmar Gabriel.
Izoh (0)