Xalqaro futbol federatsiyasi (FIFA)ning etika bo‘yicha qo‘mitasi tashkilotning sobiq vitse-prezidenti, Shimoliy va Markaziy Amerika hamda Karib havzasi mamlakatlari futbol konfederatsiyasi (KONKAKAF) prezidenti Jek Uornerni milliy va xalqaro darajada futbol bilan bog‘liq har qanday faoliyat bilan shug‘ullanishdan umrbod chetlatdi. Bu haqda, FIFA bayonotiga asoslanib, “Interfaks” xabar bermoqda.
Mazkur qaror Etika bo‘yicha qo‘mitaning Tergov palatasi tomonidan 2018 va 2022-yilgi jahon chempionatlari mezbonlarini aniqlash bo‘yicha olib borgan surishtiruvlari asosidagi hisobot asosida qabul qilingan.
Xalqaro futbol federatsiyasidagi vitse-prezidentlik o‘rnini 2011-yilda tark etgan Uorner AQSh tergovchilari tomonidan olib borilayotgan FIFAdagi korrupsiya ishi qatnashchilaridan biridir. May oyida tashkilotning sobiq vitse-prezidenti ixtiyoriy ravishda Trinidad politsiyasiga taslim bo‘lgan, biroq garov evaziga qo‘yib yuborilgandi. U AQShga ekstraditsiya qilinishi mumkin. Sobiq futbol amaldori FIFAda yuz bergan hodisa haqida “barcha haqiqat”ni tez orada aytishga va’da bergan.
AQSh hukumati iyun oyida Uornerga qarshi yana bir tergov harakatini boshlagan edi. Xabar berishlaricha, u Gaitidagi 2010-yilgi zilziladan jabr ko‘rganlar uchun ajratilgan xayriya pullarini o‘zlashtirishda gumon qilinmoqda.
Izoh (0)