Toshkentdagi Respublika olimpiya zaxiralari tennis maktabi kortlarida tennis bo‘yicha o‘tkazilayotgan Toshkent ochiq chempionatida bugun, 29-sentabr kuni ikki nafar o‘zbekistonlik tennischi bahslarga kirishdi. Bu haqda O‘zbekiston Milliy olimpiya qo‘mitasi matbuot xizmati xabar bermoqda.
Jumladan, o‘tgan yilgi Tashkent Open turnirida yarim finalga qadar yetib kelgan Nigina Abduraimova bu yil ham o‘z oldiga yuqori maqsadlarni qo‘yganligini ilk uchrashuvdayoq namoyon etdi. Yakkalik bahslarining birinchi uchrashuvida xorvatiyalik Petra Martichga qarshi kortga chiqqan Nigina, ikki set yakuniga ko‘ra, 6:4, 6:0 hisobida zafar quchdi va nimchorak finalga chiqdi.
Endi Nigina Abduraimova chorak final yo‘llanmasi uchun turnirda to‘rtinchi raqam ostida saralangan shvetsiyalik Joanna Larssonga qarshi bahs yuritadi. WTA tasnifida 62-o‘rinda borayotgan Joanna Larsson dastlabki turda shveysariyalik tennischi ustidan 6:3, 6:3 hisobida g‘alaba qozondi.
Bugungi bahslarda kortga tushgan yana bir o‘zbekistonlik tennischi Sabina Sharipova esa slovakiyalik Yana Sepelovaga 2:6, 1:6 hisobida imkoniyatni boy berdi.
Eslatib o‘tamiz, 28-sentabr kuni bo‘lib o‘tgan bahslarda Rossiya vakili Angelina Gabuyeva bilan juftlikda bahslarga kirishgan o‘zbekistonlik Vlada Yekshibarova Sabina Sharipova va Arina Folsdan iborat o‘zbekistonlik tennischilar juftligini 6:3, 6:4 hisobida mag‘lub etdi.
Izoh (0)