Халқаро футбол федерацияси (ФИФА)нинг этика бўйича қўмитаси ташкилотнинг собиқ вице-президенти, Шимолий ва Марказий Америка ҳамда Кариб ҳавзаси мамлакатлари футбол конфедерацияси (КОНКАКАФ) президенти Жек Уорнерни миллий ва халқаро даражада футбол билан боғлиқ ҳар қандай фаолият билан шуғулланишдан умрбод четлатди. Бу ҳақда, ФИФА баёнотига асосланиб, «Интерфакс» хабар бермоқда.
Мазкур қарор Этика бўйича қўмитанинг Тергов палатаси томонидан 2018 ва 2022 йилги жаҳон чемпионатлари мезбонларини аниқлаш бўйича олиб борган суриштирувлари асосидаги ҳисобот асосида қабул қилинган.
Халқаро футбол федерациясидаги вице-президентлик ўрнини 2011 йилда тарк этган Уорнер АҚШ терговчилари томонидан олиб борилаётган ФИФАдаги коррупция иши қатнашчиларидан биридир. Май ойида ташкилотнинг собиқ вице-президенти ихтиёрий равишда Тринидад полициясига таслим бўлган, бироқ гаров эвазига қўйиб юборилганди. У АҚШга экстрадиция қилиниши мумкин. Собиқ футбол амалдори ФИФАда юз берган ҳодиса ҳақида «барча ҳақиқат»ни тез орада айтишга ваъда берган.
АҚШ ҳукумати июнь ойида Уорнерга қарши яна бир тергов ҳаракатини бошлаган эди. Хабар беришларича, у Гаитидаги 2010 йилги зилзиладан жабр кўрганлар учун ажратилган хайрия пулларини ўзлаштиришда гумон қилинмоқда.
Изоҳ (0)