Meksika qamoqxona muassasalari bosh koordinatori vazifasini egallab kelgan Selina Osegera Parra “Sinaloa” narkokarteli yetakchisi Xoakin Gusman Loeraning qochishiga aloqadorlikda gumon qilinib, hibsga olindi. Bu haqda Meksika Bosh prokuraturasi ma’lum qildi, deya xabar bermoqda “RIA Novosti”.
Hozircha Parra bu ish yuzasidan javob berayotgan eng yuqori martabali amaldor bo‘lib turibdi. Undan oldinroq narkobaron qochib ketgan “Altiplano” qamoqxonasi direktori Valentin Kardenas ham qo‘lga olingandi. Jami mazkur hodisa bo‘yicha 13 kishi hibsda saqlanmoqda, ularning barchasi jinoyatchining o‘ta qattiq tartibli qamoqxonadan qochishiga yordam berganlikda ayblanmoqda.
Eslatib o‘tamiz, Xoakin Gusman Loera shu yil 11 iyulida “Altiplano” qamoqxonasidan 1,5 kilometrli yerosti tunneli orqali g‘oyib bo‘lgan. Meksika politsiyasi razvedka xizmati rahbari shundan so‘ng lavozimidan ayrildi.
Izoh (0)