Qozog‘iston prezidenti matbuot kotibi Dauren Abayevning ma’lum qilishicha, Darig‘a Nazarboyevani Qozog‘iston bosh vaziri o‘rinbosari etib tayinlashdan avval chuqur tahlillar o‘tkazilgan. Bu haqda “Nur.kz” xabar bermoqda.
“Nursulton Abishevich kadrlarni tayinlashda samaradorlik, maqsadli ko‘rsatkichlarga erishish, ko‘rsatmalarni bajarish sifati kabi ko‘plab omillarni hisobga olib, nomzodning faoliyati va mehnat ko‘rsatkichlarini jiddiy tahlil qilib, qaror chiqaradi. Tabiiyki, Darig‘a Nazarboyevaning tayinlanuvi ham izchil tahlil qilingan va bu bosh vazir Karim Masimovning taklifiga ko‘ra yuz berdi”, — dedi Nazarboyevning matbuot kotibi.
Abayevning qo‘shimcha qilishicha, Darig‘a Nazarboyeva dastlab mamlakat parlamentining ijtimoiy-madaniy taraqqiyot masalalari qo‘mitasi raisi, keyinchalik quyi palata vitse-spikeri sifatida o‘zini “samarali deputat sifatida ko‘rsata oldi”. Ayni vaqtda, Qozog‘iston prezidenti matbuot kotibining ishonch bildirishicha, Darig‘a Nursultonovnaning parlamentdan ketishi qonunchilik organi faoliyatiga salbiy ta’sir qilmaydi.
Eslatib o‘tamiz, Qozog‘iston prezidenti Nursulton Nazarboyev 11-sentabr, juma kuni o‘z qizi Darig‘a Nazarboyevani mamlakat bosh vaziri o‘rinbosari etib tayinlash haqidagi hujjatni imzolagan edi.
Izoh (0)