Keyingi ikki yil Yerda kuzatuvlarning butun tarixidagi eng issiq yillar bo‘lishi mumkin. Bunday xulosaga, “RBK” xabariga ko‘ra, Britaniya meteorologiya byurosi mutaxassislari kelgan.
Sayyoradagi havo harorati Jahon okeanidagi yuz berayotgan jarayonlar sabab ko‘tariladi. Bunda Yer sathini sezilarli isitishi kutilayotgan El-Nino eng muhim hodisaga aylanadi. El-Nino Tinch okeani suvlarining yuqori qatlamlarida haroratning ko‘tarilishi jarayoni bo‘lib, bu karbonat angidrid gazi ajralib chiqishi hajmi ko‘paygani va okeandagi tabiiy jarayonlar bilan bog‘liq.
Amerikalik olimlarning prognozlariga ko‘ra, 2015-yilda El-Nino rekord darajada kuchli hodisaga aylanib, Shimoliy Amerika g‘arbidagi suv toshqinlariga, Indoneziya, Avstraliya va Hindistonning bir qator hududlaridagi qurg‘oqchiliklarga sabab bo‘ladi va Tinch okeanining g‘arbiy qismlariga quruq jazirama havoni olib keladi.
2015-yilda El-Ninoning Atlantika okeanida kechayotgan jarayonlarga “qo‘shilishi”, muhim hal qiluvchi pallaga aylandi. Yerning aksariyat qismida yaqin ikki yil ichida havo isishi kutilayotganiga qaramay, Yevropada, katta ehtimol bilan, yozlar odatdagidan salqin keladi. Biroq olimlar buning sababini izohlab berayotgani yo‘q.
Ma’lumot uchun, 2015-yilning iyul oyi 1880-yildan boshlangan kuzatuvlar tarixidagi eng issiq davr bo‘ldi.
Izoh (0)