Xitoylik ishchilar xavfli moddalar saqlanuvchi omborlarda yuz bergan portlashlar oqibatida zarar ko‘rgan Tyanszin shahridagi metro bekatlarini qayta tiklash ishlariga kirishdi. Bu haqda “RIA Novosti” xabar bermoqda.
Hozirgi vaqtda portlash joyidan 650 metr uzoqlikda joylashgan “Dunxaylu” stansiyasining eski konstruksiyalarini olib tashlash bo‘yicha ishlar davom etmoqda. Tianjin Binhai Mass Transit Development kompaniyasidagi manbaning ma’lum qilishicha, hozirgi vaqtda bekatning yangi dizayni ishlab chiqilmoqda.
Stansiya metroning Tyanszin markazini Binxay tumani bilan bog‘lovchi yo‘nalishida joylashgan. Xavfli moddalar saqlanuvchi omborlarda yuz bergan portlashlardan so‘ng, metroning bu qismida poyezdlar harakati qisman to‘xtatilgan edi.
Eslatib o‘tamiz, Tyanszindagi yirik portlash 12-avgust kuni yuz bergan edi. Hodisa oqibatida, so‘nggi ma’lumotlarga ko‘ra, 165 kishi halok bo‘ldi, sakkiz kishi bedarak yo‘qolgan, deb gumon qilinmoqda, 800 ga yaqin odam turli darajada tan jarohati olgan.
Izoh (0)